مسئلہ ۹۴۴ : نماز خواہ واجب ہو یا مستحب اس کی ہر رکعت میں دو سجدے واجب ہیں۔ یہ سجدے رکوع کے بعد کئے جاتے ہیں۔ اور اگر کبھی دونوں سجدوں کو خواہ عمدا یا بھولے سے ترک کردے یادو سجدوں کی جگہ چار سجدے بجالائے تو نماز باطل ہے لیکن صرف ایک سجدہ کی کمی و زیادتی اگر بھولے سے ہو تو اس سے نمازباطل نہیں ہوجاتی۔
مسئلہ ۹۴۵ : سجدے میں سات چیزیں زمین پر ہونا چاہئے۔
۱۔ پیشانی
۲،۳ ۔ دونوں ہاتھوں کی ہتھیلیاں۔
۴، ۵ ۔ دونوں گھٹنے۔
۶، ۷ ۔ دونوں پیروں کے انگوٹھوں کے سرے۔
اور اگر کوئی جان بوجھ کر ان ساتوں اعضاء میں سے کسی ایک کو زمین پر نہ رکھے تو اس کا سجدہ باطل ہے۔ اور اگرپیشانی کو بھولے سے زمین پر نہ رکھے تب بھی سجدہ باطل ہے لیکن اگر پیشانی تو زمین پر ہو لیکن اور کسی عضو کو بھولے سے زمین پر نہ رکھے تو سجدہ صحیح ہے۔