مسئلہ ۷۴۶ : بناء بر احتیاط واجب نمازی کا لباس مباح ہو۔ اگر کوئی جان بوجھ کر غصبی لباس میں نماز پڑھے (یہاں تک کہ تاگا یا بٹن غصبی ہو)تو نماز کا اعادہ کرے۔ لیکن اگر نہیں جانتا تھا کہ غصبی ہے اور اس میں نماز پڑھے تو نماز صحیح ہے اسی طرح اگر پہلے جانتا رہا ہو کہ لباس غصبی ہے اور بعد میں بھول کر پڑھ لے تب بھی نماز صحیح ہے لیکن اگر خود غاصب ہو اور بھول کر نماز پڑھ لے تو یہاں پر احتیاط واجب ہے کہ نماز کا اعادہ کرے۔
مسئلہ ۷۴۷ : اگر نماز پڑھنے میں متوجہ ہو کہ اس کا لباس غصبی ہے تو اگر شرمگاہ چھپانے والی کوئی چیز بدن پر ہے تو غصبی لباس کو فورا اتار دے او رنماز پڑھتا رہے اور اگر شرمگاہ چھپانے کے لئے کوئی چیز نہیں ہے تونماز توڑ کر غیر غصبی لباس پہن کر نماز پڑھے۔
مسئلہ ۷۴۸ : اگر کوئی اپنی جان کی حفاظت کیلئے غصبی لباس میں نماز پڑھتا ہے تو نماز صحیح ہے اسی طرح اگر اس لباس کی حفاظت کے لئے کہ مبادا چور یا اس قسم کے لوگ نہ اٹھالیں اس لباس کو پہن کر نماز پڑھتا ہے تو نماز صحیح ہے۔
مسئلہ ۷۴۹ : ان پیسوں سے کہ جس کا خمس یا زکات نہ دی ہو لباس خریدکر اس میں نماز پڑھنے میں تو اشکال ہے اسی طرح اگر لباس قرض لے اور معاملے کے وقت یہ قصد رہا ہو کہ جس رقم کا خمس یا زکات نہیں دی۔ اس سے قرض ادا کروں گا یا قرض بالکل ادا نہیں کروں گا تو اس کی نماز محل اشکال ہے۔