Biz sünnülərin məşhur kitablarında yuxarıda qeyd olunan rəvayətlərlə ziddiyyətli olan digər iki rəvayətin varlığını heç də inkar etmirik. Birinci dəstədən olan rəvayətlər Peyğəmbəri-Əkrəm (səlləllahu əleyhi və alih)-in dəstəmaz alan zaman öz ayaqlarını yuduğunu deyir, digər rəvayətlər isə deyir ki, nə ayaqlarını yudu, nə də məsh çəkdi; əksinə, o həzrət ayaqqabıların üstünə məsh çəkmişdir!
Lakin üsul elmində isbat edilmiş olan bu qaydanı unutmaq olmaz: əgər bir məsələ barəsində iki qism rəvayət bir-birilə ziddiyyətdə olarsa, əvvəlcə onların dəlalət baxımından təzadlarını aradan qaldırmaq, yə’ni onları elə təfsir və izah etmək lazımdır ki, hər ikisi (əlbəttə, ürfi dərk me’yarlarına uyğun olaraq) bir-birinə uyğun gələ bilsin.
Amma onların bir-biri ilə uyğunlaşdırılması, təzadlarının aradan qaldırılması, ümumiyyətlə mümkün olmazsa, onda Allahın Kitabı ilə müqayisə edilməlidir, yə’ni hansı biri Qur’anla uyğun olsa, onu əxz, digərini isə tərk etmək lazımdır. Bu qanun mö’təbər dəlillər vasitəsilə sübuta yetmişdir.
Buna əsasən, «məsh» və «ğəsl» (ayağın yuyulması) rəvayətləri arasındakı ixtilafı aradan qaldırmaq üçün belə demək olar ki, Peyğəmbər (səlləllahu əleyhi və alih) məsh vəzifəsini dəstəmazda yerinə yetirir, sonra ayaqlarının pak olması üçün bə’zən onları yuyur, amma bunu dəstəmazın bir hissəsi hesab etmirdi. Bu səhnəni görən ravilərdən bə’ziləri də belə təsəvvür etmişdilər ki, ayaqların yuyulması dəstəmazın bir hissəsidir.
Şiələrin arasında da çoxları bu işi görür: dəstəmaz vəzifəsini, yə’ni məshi yerinə yetirdikdən sonra, paklıq məqsədi ilə öz ayaqlarını tər-təmiz yuyurlar.
Bu iş havanın istiliyinə görə yanları bağlı ayaqqabılardan yox, nə’leyndən istifadə edilən mühitlərdə daha zəruri nəzərə çarpır. Çünki nə’leyn ayaqları toz-torpaqdan, aludəliklərdən tam şəkildə qoruyub saxlaya bilmir.
Hər bir halda, vacib vəzifə olan məsh ilə, ayaqların adi şəkildə yuyulması ayrı- ayrı məsələlər olmuşdur.
Belə bir ehtimal da verilə bilər ki, nəss müqabilində ictihad etmək fəqihlərin bir qrupunu, ayaqların yuyulmasına dair fətva verməyə vadar etmiş və onlar belə fikirləşmişlər ki, ayaqların çirki yalnız yumaqla paklanıb aradan gedə bilər. Bundan sonra da «Maidə» surəsinin məshə göstəriş verən ayəsinin zahiri mə’nasını tərk etmişlər. Sünnü alimlərinin bə’ziləri (yuxarıdakı bəhslərdə qeyd olunduğu kimi) belə demişlər: Yaxşı olar ki, ayaqlarda olan aludəliklərə görə, onu yuyaq və bu iş də məsh kafi deyildir.