Qadınlar, malik olduqları incə duyğu və atifələrə görə təsəlli tapmaq üçün öz əzizlərinin qəbirlərini ziyarət etməyə daha çox ehtiyac hiss edirlər. Təcrübə göstərmişdir ki, onlar ilahi övliyaların qəbirlərini ziyarət etməyə daha artıq maraq və həvəs göstərirlər.
Amma təəssüflər olsun ki, ifratçı vəhhabilər müəmmalı bir hədisə istinad edərək qadınları bu ziyarətdən şiddətlə çəkindirirlər. İranın cənub məntəqələrində yaşayan bir qövmün arasında belə bir məsəl vardır: «Ölmüş şəxs onun qəbri üzərinə gedən qadını anadangəlmə çılpaq adam kimi görür.»
Alimlərdən biri deyirdi ki, mən onlara dedim: – Peyğəmbər (səlləllahu əleyhi və alih)-in, birinci və ikinci xəlifənin qəbri Ayişənin evində idi. Ayişə uzun müddət orada yaşayır, yaxud oraya gedib-gəlirdi. Tutaq ki, onun çılpaq görünməsinin Peyğəmbər üçün heç bir eybi yoxdur, amma birinci və ikinci xəlifə üçün nə deyirsiniz?! Ümumiyyətlə, onların dəlilləri Peyğəmbərə aid edilən aşağıdakı hədisdir:
لَعَنَ اللهُ زائِراتِ الْقُبُورِ
«Allah qəbirləri ziyarət edən qadınlara lə’nət etsin!»
Bə’zi rəvayət kitablarında «zairat» sözünün yerinə «zəvvaratil-qubur» qeyd olunmuşdur ki, daha artıq mübaliğəni çatdırır.
Sünnü alimlərindən bir çoxu, o cümlədən Tirmizi yazır: «Bu hədis o zamana aid idi ki, Peyğəmbər onları bu işdən çəkindirirdi. Amma bu hökm sonralar nəsx olundu.»[1]
Sünnü alimlərindən bə’ziləri də demişlər ki, «bu hədis o qadınlara aiddir ki, ziyarətə çox vaxt sərf edir və ərlərinin hüquqlarını aradan aparırdılar. Mübaliğə siğəsi olan «zəvvarat» da buna dəlildir.»
Bu qardaşlar hər şeyi inkar etsələr də, Peyğəmbər (səlləllahu əleyhi və alih)-in, birinci və ikinci xəlifənin qəbrini öz evində yerləşdirən Ayişənin işini heç vaxt inkar edə bilməzlər.
Səfər niyyəti ilə hazırlaşmaq yalnız üç məscidə caizdir!
İslam tarixində və uzun əsrlər boyu müsəlmanlar əziz Peyğəmbərimiz (səlləllahu əleyhi və alih)-in və böyük din şəxsiyyətlərinin qəbrini ziyarət etmək üçün «Bəqi»də şəddü-rihal edir (bu niyyətlə səfərə gedir), sonra hərəkət edirdilər və heç kəs üçün də problem yox idi.
Nəhayət, 7-ci hicri əsrində İbni Teymiyyə öz ardıcıllarını bu işdən çəkindirdi və dedi: «Şəddü-rihal yalnız üç məscidin ziyarəti üçün caiz, qalanları üçün isə qadağandır.» O, bu barədə Əbu Hüreyrənin hədisinə istinad etmişdir. Əbu Hüreyrə deyir ki, Peyğəmbər buyurdu:
لا تشد الرحال الا الی ثلاثة مساجد مسجدی هذا ومسجد الحرام ومسجد الاقصی
«Üç məsciddən başqa heç nə üçün səfər yükünü bağlamayın: Mənim bu məscidim, Məscidül-Həram və Məscidül-əqsa.»[2]
Halbuki, əvvəla, bu hədisin mövzusu hər məkanda olan ziyarətə aid deyil, yalnız üç məscidə aiddir. Deməli, hədisin məzmunu budur ki, heç bir məscid üçün şəddü rihal etməyin, yalnız bu üç məscid istisnadır.
İkincisi, bu hədis başqa yollarla da nəql olunmuşdur ki, onların iddia etdikləri mə’naya əsla dəlalət etmir, o da bundan ibarətdir: «Üç məscid üçün şəddi-rihal (səfər) edilər.»[3]
Bu, həqiqətdə bu işə təşviq sayılır, amma digər halları inkar etmir və istilahda desək, «bir şeyin isbat olunması ondan qeyrilərini inkar etmir.»
Hədisin əsl mətninin birincimi, yoxsa ikinci halda olması mə’lum olmadığından, «mücməl» sayılır və ona istinad etmək olmaz.
Belə deyilə bilər ki, digər bir mətndə (həmin kitabda) qeyd olunur ki, «innəma yusafəru ila səlasi məsacidə-səfər yalnız üç məscid üçün caizdir.»[4] Deməli, şəddi-rihal (səfər) yalnız bu üç məscid üçün caizdir!
Bu sualın cavabı aydındır. Çünki, əvvəla: ümmətin icmasına əsasən, çoxlu məsələlər üçün dini və qeyri-dini səfərlər etmək caizdir və səfər, yalnız bu üç məscidə doğru edilən səfərlə bitmir. Deməli, qeyd olunan həsr izafi (nisbi) həsr olacaqdır. Yə’ni məscidlər arasında yalnız bu üç məscidə şəddi-rihal etmək olar.
İkincisi, hədisin mətni şübhəlidir: onun birinci, ikinci, yoxsa üçüncüsü olması mə’lum deyildir. Peyğəmbər (səlləllahu əleyhi və alih)-in üç dəfə və üç ibarə ilə deməsi də çox uzaq ehtimaldır. Zahir budur ki, ravilər bunun mə’nasını nəql etmişlər. Nəticədə qeyd olunan hədis müəmmalı şəkildə qalır və müəmmalı hədisə istinad etməyin heç bir e’tibarı yoxdur.
[1] «Sünəni Tirmizi», 3-cü cild, səh.371 (O, kitabın bu babını «ma caə minər-ruxsəti fi ziyarətil-qubur» adlandırmışdır.)
[2] «Səhihi Müslüm», 4-cü cild, səh.126.
[3] Yenə orada.
[4] «Səhihi Müslüm», 4-cü cild, səh.126.