Digər bir bəhanə böyük dini şəxsiyyətlərinin qəbrinin ziyarətinə gedənlər onların qəbirlərinə təbərrük edir, bə’zən qəbri və yaxud zərihi öpürlər. Vəhhabilər onlara deyirlər ki, bundan şirk qoxusu gəlir. Həmin səbəbə görə də Allah evinin ziyarətçiləri mütləq görmüşlər: «ğilaz» və «şidad» mə’murları Peyğəmbər (səlləllahu əleyhi və alih)-in qəbrini əhatəyə alaraq camaatın dəmir şəbəkəyə və mütəhhər qəbrə açılan pəncərələrə yaxınlaşmasının qarşısını alır; bə’zən bu mətləbi İbni Teymiyyəyə, bə’zən də Məhəmməd ibni Əbdül-Vəhhaba aid edirlər. Şübhəsiz, əgər vəhhabi ideologiyasının əsaslarını qoyan bu iki nəfər Peyğəmbər (səlləllahu əleyhi və alih)-in əsrində yaşasaydılar və «Hüdeybiyyə» sülhündə, yaxud Məkkənin fəthində o həzrətin dəstəmaz aldığı vəxt səhabələrin bir-biri ilə yarışaraq dəstəmazının suyunu təbərrük ünvanı ilə götürərək bir damcısının belə, yerə düşməsinə imkan vermədiklərini öz gözləri ilə görsəydilər,[1] o həzrətin işinə dildə irad tutmasaydılar da, şübhəsiz, qəlblərində irad tutub «bu Peyğəmbərə və onun köməkçilərinə layiq deyildir, bu işdən şirk qoxusu gəlir!» deyəcəkdilər.
Yaxud əgər Peyğəmbər (səlləllahu əleyhi və alih)-in vəfatından sonra Mədinədə olsaydılar və Əbu Əyyub Ənsarinin – Peyğəmbəri ilk dəfə qonaq saxlayan şəxsin öz üzünü o həxrətin qəbrinə qoyaraq təbərrük etdiyini,[2] yaxud Peyğəmbər (səlləllahu əleyhi və alih)-in azançısı Bilalın o həzrətin qəbrinin yanında oturub ağlamasını və üzünü o həzrətin qəbrinə sürtməsini görsəydilər[3] Bilalın və Əbu Əyyubun yaxasından tutaraq onları bir tərəfə tullayar və deyərdilər ki, bu iş şirkdir! Həmin iş ki, bu məktəbin ardıcılları hal-hazırda Peyğəmbər qəbrinin zairlərinə qarşı rəva görürlər. Halbuki, təbərrük etməyin pərəstişlə azacıq belə əlaqəsi yoxdur, əksinə onun məfhumu bir növ ədəblə yanaşı olan ehtiramdır. Təbərrük edən şəxs ümid bəsləyir ki, Peyğəmbəri göndərən Allah, bu ehtiram xatirinə Öz xeyir-bərəkətini ziyarət edən şəxsə nazil edəcəkdir.
[1] Bu məsələ Peyğəmbər (səlləllahu əleyhi və alih)-in həyatında dəfələrlə baş vermişdir. «Səhihi Müslüm», c.4, s.1943; «Kənzül-ümmal», c.16, s. 229.
[2] «Müstədrəkus-səhiheyn», 4-cü cild, səh.560
[3] «Tarixi İbni Əsakir», 7-ci cild, səh.137.