İlk baxışda (ayənin zahirindən) belə başa düşülür ki, “Qədr” gecəsinin min aydan üstün olması, onda edilən ibadətin və o gecədə saxlanılan əhyanın dəyəri baxımındandır. Qədr gecəsinin fəziləti və o gecədə edilən ibadətin savabı barədə şiə və əhli-sünnə kitablarında geniş şəkildə qeyd olunan rəvayətlər bu mənanı təsdiqləyir.

Bu barədə müxtəlif təfsirlər var. Rəvayətdə deyilir: “O gecədə insanların bir illik müqəddəratı təyin olunur. Ruzilər, əcəllər və digər işlər o mübarək gecədə bölüşdürülür.”

Qədr gecələrinin əməlləri iki qismə bölünür: üç Qədr gecəsi üçün müştərək olan əməllər və hər birinin özünəməxsus əməlləri. Qüsl etmək, oyaq qalmaq, 100 rükət namaz qılmaq və dua oxumaq bu gecələrin müştərək əməllərindən sayılır. Eyni zamanda hər gecənin özünə məxsus əməlləri də var.

Ehtimal etmək olar ki, Qədr gecəsinin gizli olması insanların bütün gecələrə əhəmiyyət verməsi üçündür. Misal üçün rəvayətə görə Allah-taala razılığını müxtəlif itaət və ibadətlər arasında gizlətmişdir ki, insanlar bütün ibadətləri yerinə yetirsinlər.

Peyğəmbərdən (s) nəql edilən bir hədisdə belə deyilir: “Allah Qədr gecəsini mənim ümmətimə bəxş etdi və əvvəlki ümmətlərdən heç birinə bu nemət verilməmişdir.”