Mərhəmət dini - İslam maarifi və əqidəvi şübhələrə cavab

İbn Cövziyə görə "Əlinin qapısı" hədisini şiələr onu “Səhiheyn”də qeyd olunan “Əbubəkrin pəncərəsi” hədisinin qarşısında düzəltmişlər. Lakin bu hədislər mütəvatir həddində olmaqla yanaşı səhih sənədlərə də malikdirlər. Amma "Əbubəkrin pəncərəsi" hədisi sənədinin səhih olmasını fərz etsək belə, vahid xəbərdir. Buna görə də o, mütəvatir hədislərlə müqayisə edilə bilməz.

İbn Cövzi yazır: "Əlinin qapısından başqa bütün qapıların bağlaması" silsilə hədislərinin hamısı batildir. Şiələr onu “Səhiheyn”də qeyd olunan “Əbubəkrin evinin pəncərəsindən başqa bütün pəncərələri bağlayın” hədisinin qarşısında düzəltmişlər. (2)

Cavabında deyirik:

Əvvəla: Hansı dəlilə əsasən bu hədislərin hamısı batil və şiələrin uydurması hesab olunur?! Sadəcə bir iddia hər hansı bir mətləbi sübut edə bilməz!

İkincisi: Haradan məlumdur ki, "Əbubəkrin pəncərəsi" hədisi saxta olmasın?! Haradan bilirsiniz ki, bu hədis "Əlinin qapısından başqa bütün qapıların bağlanması" hədisinin müqabilində bir fəzilət olaraq Əbubəkr üçün düzəldilməyib?!

Üçüncüsü: Bu hədisləri necə batil hesab etmək olar?! Halbuki onlar mütəvatir həddində olmaqla yanaşı səhih sənədlərə də malikdirlər. Amma "Əbubəkrin pəncərəsi" hədisi sənədinin səhih olmasını fərz etsək belə, vahid xəbərdir. Buna görə də o, mütəvatir hədislərlə müqayisə edilə bilməz.

Dördüncüsü: Suyuti “Əl-ləalil-məsnuə” kitabında – İbn Həcərin “Əl-qovlul-musəddəd fizzəbbi ən Müsnədi Əhməd” kitabından, İbn Cövzinin bu hədislərin batil olması ilə əlaqədar sözünü nəql etdikdən sonra – yazır: “Bu (İbn Covzinin iddiası) elə bir iddiadır ki, onun dəlili “Səhiheyn”də gələn rəvayətlə müxalif olmasıdır. Bu iş sırf təvəhhüm (xəyali fikir) əsasında səhih hədisləri rədd etməkdir. Layiq deyildir ki, hər hansı bir hədisin saxta olmasına hökm olunsun; yalnız o zaman hökm oluna bilər ki, cəm etmək mümkün olmasın.” (3)

Həmçinin İbn Əbil-Hədid Mötəzili deyir: “Qapıların bağlanması hədisi yalnız Əli (əleyhis-salam) barəsindədir. Əbubəkrin tərəfdarları onu təhrif edərək Əbubəkrin adına çıxarmışlar.” (3) (4)