Biz mö`tədil yolu seçən vəhhabi alimlərinin hamısına dostcasına tövsiyə edirik ki, vəhhabiyyət prinsiplərinə yeni baxılmasına şərait yaranan hazırkı tarixi şəraitdə bu fürsətləri əldən verməsinlər, onlarla sair dünya müsəlmanları arasında yaranan və düşmənin istifadə etdiyi dərin ixtilaf və anlaşılmazlıqları aradan qaldırsınlar və bu boşluqları ayıqlıqla doldursunlar.
Biz aşağıdakı məsələləri dostcasına təklif olaraq irəli sürürük:
1-Müsəlmanları şirk və küfrlə müttəhim etməyi heç olmazsa, ictihadi məsələ hesab olunsun deyə, məhkum etsinlər, Qur`anın buyurduğu
وَلاَ تَقُولُواْ لِمَنْ أَلْقَى إِلَیْکُمُ السَّلاَمَ لَسْتَ مُؤْمِنًا تَبْتَغُونَ عَرَضَ الْحَیَاةِ الدُّنْیَا
kəlamını bütün ardıcıllarına tövsiyə etsinlər.
2-İraq, Pakistan, Əfqanıstan və hətta Ərəbistanın özündə və sair məntəqələrdə baş verən vəhşilik və terrorist əməliyyatlarını şiddətlə məhkum etsinlər. Bu terrorist və yaramaz əməllər böyük dağıntılara səbəb olmaqdan əlavə, günahsız müsəlmanların – qadın-kişi, uşaq, qoca və cavan, sünnü-şiə – qanlarını axıdır.
Gələcəkdə bütün dünyanın vahid dini olan İslam iftixarını bədnam etməsinlər, İslamın və müsəlmanların əleyhinə ən yaxşı təbliğat vasitələrini düşmənlərin əlinə verməsinlər, İslam alimləri, mübəlliğləri və agah yazıçıların İslamı yaymaq yolunda çəkdiyi bütün zəhmətləri puça çıxarmasınlar. Bəli, bunların hamısını məhkum edərək Qur`anda qeyd olunan «hərs və nəslin həlak olması» hesab etsinlər.
3-Özlərilə sair İslam alimləri arasında qarşılıqlı ehtiram, dostluq və məntiqi danışıq yolunu, hər növ təhqir, şirk, cəhalət və töhmətdən uzaq olan dialoq yolunu açsınlar, ixtilaflı məsələlərdə bəhs edib «yəstəmiunəl-qovlə fəyəttəbiunə əhsənəh» ayəsini qəbul etsinlər.
4-Özlərinin ideoloji və coğrafi sərhədlərini sair İslam məzhəblərindən olan elmi və məntiqi kitabların üzünə açsınlar, bu işdə özləri üçün heç bir təhlükə hiss etməsinlər və İslam ölkələrinin elmiyyə hövzələri və tələbələr arasında fikir mübadiləsi aparsınlar.
5-Özlərilə sair müsəlmanlar arasında olan e`timadsızlıq, sui-zən, bədbinlik pərdələrini aradan qaldırsınlar, bir-birinin elmiyyə hövzələrinə gediş-gəliş etsinlər, İslamın müxtəlif məsələləri barədə təşkil olunan konfranslarda iştirak etmək üçün dünyanın hər yerində hazırlıqlarını e`lan etsinlər.
6-Öz dostlarını mütləqçilik fikrindən çəkindirsinlər, yə`ni özlərinin füruiddin və üsuliddin müqabilində olan ictihadlarını İslamın həqiqəti hesab etmək, başqalarını isə küfr, zəlalət, bid`ətçi hesab etmək kimi məsələlərdən uzaq olsunlar və “və ma utiytum minəl-elmi illa qəlilən” – ayəsinə əməl etsinlər.
Əgər qeyd olunan bu altı təklifə əməl etsələr ümidvarıq ki, müsəlmanların arasındakı vəhdət möhkəmlənəcək, Allahın ipinə sarılmaq kamilləşəcək və “Liyuzhirəhu ələddini kulluh” ayəsi gerçəkləşəcək. O günün ümidi ilə!
Vəllahul-müstəan
Son
Məhərrəm, 1426
Nasir Məkarim Şirazi