Mən İslam elmlərinin xidmətçilərindən biri kimi uca səslə deyirəm: Bu terrorist qrupun (təəssüblü vəhhabilərin) İslam barəsində təqdim etdikləri sima bu dinin həqiqi siması deyildir; əksinə, İslam elmlərindən çox az miqdarda bəhrələnən və İslam alimlərinin əksəriyyəti tərəfindən müxalifətlə qarşılanan bir qrupun şəxsi əqidəsidir.
Biz kitabın son bölməsində Qur`anın və İslam hədislərinin aşkar buyuruğu əsasında onların bu çıxarışda xətaya yol vermələrini aydınlaşdıracağıq ki, onların arasında olan və məntiqi dəlilləri qəbul edən mö`tədil əqidəli şəxslər İslamın düzgün yolunun vəhhabilikdə deyil, başqa yerdə olduğunu bilsinlər.
Mən böyük İslam alimlərinin qarşısında tə`zim edir və onların hamısından xahiş edirəm ki, əl-ələ verib bir səslə desinlər: Özlərindən başqa hamını müşrik hesab edən və buna görə də onların qanını və malını mübah (hədər) hesab edən bu kiçik təəssübkeş qrup İslamın həqiqi nümayəndələri deyildirlər. Aydındır ki, bugünkü dünyada belə məzhəbə heç bir yer yoxdur, onlar artıq süqut və tənəzzül mərhələsindədirlər və onların ömrü artıq sona çatmışdır. Biz mehr-məhəbbətdən ibarət olan İslam dinini dünyaya özünün həqiqi formasında təqdim etməliyik ki, hamı tərəfindən qəbul olunsun, İslam özünün genişmiqyaslı inkişafına həmin qaydada davam etsin, məzlum təbəqələrin qəlblərini və fikirlərini ayıldıb təsxir edərək öz ixtiyarına keçirsin.
Hamısından qəribəsi budur ki, bu qrupun törətdiyi cinayətlər özlərinin hakimiyyətə gətirdiyi hökumətin (Ali Səud hökumətinin) boğazını tıxmış və onlar Səudiyyə ölkəsində çox dəhşətli terrorlar icad etmişlər, hətta Səudiyyə dövləti belə, onların yerli əhali üçün yaratdığı təhlükələri e`tiraf etmiş, onların fəaliyyət hüdudlarını məhdudlaşdırmaq qərarına gəlmiş və vəhhabilərin dini mərkəzlərində tədris olunan tə`limatlara yenidən baxılmasına – təftişə başlamışdır. Bu dövlət ifratçı şəxsləri məscidin imamətindən kənarlaşdırmışdır ki, bu da təəssübkeş vəhhabiyyətin ömrünün sona çatmasına dair bir dəlildir, çünki onlara özünün yaranma mərkəzində belə artıq yer yoxdur.
