بعض مفسرین نے زیر بحث آ یت کی ایک شانِ نزول بھی بیان کی ہے جس کا خلاصہ یہ ہے کہ
پیغمبراکر م(صلی اللہ علیہ وآلہ وسلم ) کی ایک مشرک سے جس کانام ” رکانہ “ تھا
اطراف ِ مکّہ کے ایک پہاڑ پر تنہائی میں ملاقات ہوئی . باوجود اس کے کہ لکانہ مکّہ
کے لوگوں میں سب سے زیادہ قوی اور طاقتور تھا ، پیغمبراکرم (صلی اللہ علیہ وآلہ
وسلم ) نے اسے زمین پر پٹخ دیاتاکہ اس پر ظاہر کردیں کہ آپ معجزے کی طاقت رکھتے
ہیں کیونکہ عام حیثیت کے لحاظ سے حریف کی کامیابی مسلّم تھی . اس کے بعد آپ نے
اپنے کچھ اورمعجزات بھی اسے دکھائے کہ جو اس کی ہدایت کے لیے کافی تھے لیکن وہ نہ
صرف یہ کہ ایمان نہیں لایا بلکہ مکّہ میں آیا اور چلاّ کر کہا :
یابنی ھاشم ساحروا بصاحبکم اھل الارض
اے بنی ہاشم ! تمہاراساتھی جادُو میں اتنا قوی ہے کہ تم اس کے ذر یعہ روئے زمین کے
تمام جادو گروں کا مقابلہ کرسکتے ہو ۔
زیرنظر آ یات اس کے اوراس جیسے افراد کے بار ے میں نازل ہوئیں ( 1) ۔
1۔ تفسیرروح المعانی جلد ۲۲ ،ص ۷۱۔